“Barselona” ulduz futbolçu üçün səfərbər oldu

AVRO-2024-də İspaniya millisinin heyətindəki inamlı çıxışı ilə diqqət çəkən Niko Uilyams karyerasını “Barselona”da davam etdirməyə yaxındır.

Bu yay azı bir ulduzu kluba gətirmək istəyən prezident Joan Laporta bunun üçün 3 futbolçunu transferə çıxarmaq niyyətindədir.

Bildirilir ki, bu oyunçular Frenki de Yonq, Rafinya və Ronald Arauxodur. Lakin “Transfermarkt” portalına əsasən, dəyəri 60 milyon avro olan Niko “blauqrana” ilə yanaşı, “Çelsi”nin də hədəfindədir.

Qeyd edək ki, Niko Uilyams 2021-ci ildən “Atletik”in əsas heyətində top qovur. Bilbaoluların forması ilə 122 oyunda 20 qol vuran 21 yaşlı futbolçu ötən mövsüm klubla İspaniya Kubokunun qalibi olub. Əlavə edək ki, Niko 2022-ci ildən ölkəsinin əsas millisinə dəvət olunur. 17 görüşdə “Qırmızı Furiya”nın şərəfini qoruyan Uilyams 3 qola imza atıb.