“Bavariya” klubunda vəziyyət gərginləşir

“Bavariya” komandasında tezliklə baş məşqçi postunda dəyişiklik ola bilər.

Belə ki, Çempionlar liqasında “Latsio”ya, ardınca isə bundesliqada “Bohum”a məğlubiyyətdən sonra klub rəhbərliyi Tomas Tuxellə vidalaşmağı nəzərdən keçirir. Kollektivin oyunundan, eləcə də son 3 matçda uduzmasından qəzəblənən idarə heyəti Zinəddin Zidanı dəvət etməyi planlaşdırır.

KİV-də yayılan xəbərlərə görə, “rekordmayster” artıq fransalı mütəxəssislə əlaqə saxlayıb. Ancaq Zidanın bu təklifə necə reaksiya verdiyi hələ ki məlum deyil. Onun Münhen komandasına keçməyi rədd edəcəyi təqdirdə, Almaniya nəhəngi Antonio Konte və Joze Mourinyo kimi tanınmış mütəxəssislərə müraciət etməyi planlaşdırır.

Qeyd edək ki, ötən mövsüm Tomas Tuxelin rəhbərliyi ilə Bundesliqada çətinliklə qalib gələn “Bavariya” hazırda çempionatda 2-ci yerdədir. Komanda lider “Bayer Leverkuzen”dən 8 xal geri qalır.