Boksçularımız Avropa çempionatında qızıl medal qazanıb

Azərbaycanın gənc boksçulardan ibarət milli komandası Xorvatiyada keçirilən Avropa birinciliyində uğurla çıxış edib.

İdmançılarımız Poreç şəhərində təşkil olunan turnirdə 2 qızıl medal qazanıblar. Təmsilçilərimizdən 48 kq-da yer alan Bilalhəbaşi Nəzərov finalda ukraynalı Oleksandr Zverevi məğlub edərək Avropa çempionu tituluna yiyələnib.

54 kq çəki dərəcəsində mübarizə aparan Ömər Aslanlı da Xorvatiyadakı yarışda fəxri kürsünün ən yüksək pilləsinə qalxıb. Həlledici görüşdə ukraynalı Maksim Çekindən güclü olan Ömər turnirdə 1-ci yeri tutub.

Qeyd edək ki, 10 gün davam edən qitə birinciliyində ölkəmiz 11 boksçu ilə təmsil olunub. Ümumən isə yarışda 35 ölkədən 253-ü oğlan və 123-ü qız olmaqla 376 boksçu qüvvəsini sınayıb.