Bu gün Bakıda Formula 1 üzrə Azərbaycan Qran-prisi başlayır

Bu gün “Formula 1” üzrə Azərbaycan Qran-prisinə start veriləcək.

Artıq 8-ci dəfə təşkil olunan yarışın ilk günündə iki sərbəst yürüş baş tutacaq. Sentyabrın 14-də 3-cü sərbəst yürüş və sıralama turu, sentyabrın 15-də isə əsas yarış keçiriləcək.

Qeyd edək ki, 2024-cü ilin Azərbaycan Qran-prisi ərəfəsində ümumi sıralamaya Maks Ferstappen başçılıq edir. 303 xalı olan “Red Bull” üzvü ən yaxın izləyicisi, “Maklaren-Mersedes” sürücüsü Lando Norrisi 62 xal qabaqlayır. 3-cü pillədə isə 217 xalla “Ferrari” pilotu Şarl Lekler qərarlaşıb.

Mühəndislər kuboku uğrunda mübarizədə də 446 xalı olan “Red Bull” irəlidədir. Avstriya kollektivi 2-ci yerdəki “Maklaren-Mersedes”i 8 xal qabaqlayır.