“Çelsi” - “Mançester Yunayted” matçında qol yağışı olub

İngiltərə Premyer liqasında 31-ci turun mərkəzi matçı “Çelsi” və “Mançester Yunayted” arasında olub.

“Stemford Bric” arenasındakı görüşdə 7 qol vurulub.

Oyuna meydan sahibləri yaxşı başlayıblar. “Zadəganlar” əvvəlcə Qallaxer, bir qədər sonra isə Palmerin topları ilə 2-0 hesablı üstünlük qazanıblar. Ancaq “qırmızı şeytanlar” fasiləyədək tarazlığı bərpa ediblər. Qarnaço və Brunu Fernandeşin zərbələri dəqiq olub.

67-ci dəqiqədə isə dubl edən Qarnaço mankunianları irəli çıxarıb: 3-2. Lakin London təmsilçisi dönüş etməyi bacarıb. Əsas vaxta artırılan 10-cu dəqiqədə hesabı bərabərləşdirən Koul Palmer 1 dəqiqə sonra komandasının qələbə topunu vurub. “Çelsi” – “Mançester Yunayted”: 4-3. Bu nəticədən sonra 43 xal toplayan “Çelsi” 10-cu, 48 xalı olan “Yunayted” isə 6-cı yerdədir.

Digər matçda çempionluq mübarizəsinin iştirakçısı “Liverpul” “Şeffild Yunayted”i qəbul edib. 4 qolun qeydə alındığı oyunda “qırmızılar” Darvin Nunyez, Aleksis Mak Allister və Kodi Qakponun topları sayəsində 3-1 hesablı qalibiyyət əldə ediblər. Bu qələbə ilə xallarının sayını 70-ə çatdıran “Liverpul” yenidən liderliyə yüksəlib. Komanda 2-ci yerdəki “Arsenal”ı 2, 3-cü pillədəki “Mançester Siti”ni isə 3 xal qabaqlayır.