Çempionlar liqası “Bavariya” - PSJ matçı

UEFA Çempionlar Liqasında 1/4 final mərhələsinin daha 2 iştirakçısı məlum olub.

Parisdəki matçda PSJ-ni 1-0 hesabı ilə məğlub edən “Bavariya” bu dəfə rəqibini “Alyans Arena”da qəbul edib. İlk hissədə komandaların fərqlənmək imkanları olsa da, tərəflər fasiləyə qolsuz bərabərliklə yollanıb. 2-ci yarının əvvəlində isə Çupo-Motinq parislilərin qapısına yol tapıb. Lakin ofsayd səbəbi ilə qol qeydə alınmayıb.

Bununla belə, kamerunlu hücumçu 9 dəqiqə sonra istəyinə çataraq hesabı açıb. Qalan vaxtda PSJ-nin qol vurmaq cəhdləri nəticə verməyib. 89-cu dəqiqədə isə Qnabri 2-ci topu Fransa klubunun qapısından keçirib. “Bavariya” - PSJ : 2-0.

Beləliklə, 2 görüşün yekununda 3-0 hesablı qələbə qazanan “rekordmayster” 1/4 finala yüksəlib.

Mərhələ adlayan digər kollektiv “Tottenhem” və “Milan” arasında mübarizədə müəyyənləşib. Londonda keçirilən qarşılaşma gərginliyi ilə diqqət çəksə də, azarkeşlər 90 dəqiqə ərzində qol görməyiblər. 77-ci dəqiqədə isə “mahmızlar” azlıqda qalıblar. Romero 2-ci sarı vərəqədən sonra meydandan uzaqlaşdırılıb. İtaliyadakı ilk matç “rossoneri”nin 1-0 hesablı qalibiyyəti ilə başa çatdığı üçün “Milan” 2 oyunun nəticəsində 1/4 finala yüksəlib.