Çempionlar liqası: Borussiya Dortmund - Atletiko matçı

Çempionlar liqasında yarımfinalın digər iştirakçısını Dortmund “Borussiya”sı və “Atletiko” müəyyənləşdiriblər.

İlk oyunda 2-1 hesabı ilə güclü olan madridlilər görüş ərəfəsində üstünlüyə malik olsalar da, “sarı-qaralar” artıq fasiləyədək 2 qol vurmağı bacarıblar.

Əvvəlcə 34-cü dəqiqədə Yulian Brandt dortmundluları irəli çıxarıb: 1-0. 5 dəqiqə sonra İan Matsen 2-ci topu İspaniya klubunun qapısından keçirib.

İlk hissəni 0-2 hesabı ilə geridə tamamlayan “Atletiko” 49-cu dəqiqədə qollardan birinin əvəzini çıxıb. Mats Hummelsin səhv toxunuşu avtoqolla nəticələnib. 64-cü dəqiqədə isə Anxel Korrea hesabı bərabərləşdirib: 2-2. Lakin ruhdan düşməyən “Borussiya” mübarizənin gedişində növbəti dəfə dönüş edib.

71-ci dəqiqədə Niklas Fülkruqun qolu ilə önə çıxan meydan sahibləri bir qədər sonra qonaqları 4-cü dəfə oyuna mərkəzdən başlamağa məcbur ediblər. Marsel Zabitserin dəqiq zərbəsi qarşılaşmada həm də yekun nəticəni müəyyənləşdirib.

“Siqnal İduna Park” arenasındakı matçda 4-2, ümumilikdə isə 5-4 hesablı qələbə qazanan “Borussiya” Çempionlar liqasının yarımfinalında “Pari Sen-Jermen”ə rəqib olub. Bu kollektivlər arasında ilk görüş aprelin 30-u Almaniyada, cavab oyunu isə mayın 7-si Fransada olacaq.