Çempionlar liqası: “Qalatasaray” - “Mançester Yunayted” matçı

“Qalatasaray” qrup mərhələsinin 5-ci turunda “Mançester Yunayted”i qəbul edib.

“Rams Park” stadionunda keçirilən matçda hesab 11-ci dəqiqədə açılıb. Alehandro Qarnaço “qırmızı şeytanlar”ı irəli çıxarıb. Bir qədər sonra Brunu Fernandeş uzaq məsafədən fərqlənərək hesabı 2-0 edib.

İlk hissənin sonunadək “cim-bom” toplardan birinin əvəzini çıxıb. Hakim Ziyeş cərimə zərbəsindən fərqlənib. 55-ci dəqiqədə Skott Maktomini mankunianların 3-cü qolunu vurub.

Ancaq “Qalatasaray” məğlubiyyətdən xilas ola bilib. Əvvəlcə Ziyeş dubl edərək, fərqi azaldıb. 71-ci dəqiqədə isə Kərəm Aktürkoğlu tarazlığı bərpa edib: 3-3. Qalan vaxtda qol vəziyyətləri yaransa da, oyun məhz bu hesabla yekunlaşıb.

Bu nəticədən sonra A qrupunda 5 xalı olan “Qalatasaray” “Kopenhagen”lə 2-ci, 3-cü yerləri bölüşdürür. “Mançester Yunayted” isə 4 xalla 4-cü pillədədir.