Çempionlar Liqası: “Qalatasaray” Sloveniya klubunu darmadağın etdi

09 avqust 2023

“Qalatasaray” klubu UEFA Çempionlar liqasında növbəti görüşünü keçirib.

“Sarı-qırmızılar” yarışın III təsnifat mərhələsində Sloveniyanın “Olimpiya” kollektivinin qonağı olublar.

“Stojiçe” stadionunda baş tutan matçda hesab 9-cu dəqiqədə açılıb. Kerem Aktürkoğlu “cimbom”un ilk qolunu vurub. Fasiləyə tərəflər “Qalatasaray”ın minimal üstünlüyü ilə yollanıblar.

2-ci yarıda da təzyiqi azaltmayan İstanbul təmsilçisi 48-ci dəqiqədə fərqi artırıb. Bu dəfə Dris Mertens qapını dəqiq nişan alıb. Oyunda son nöqtəni əsas vaxta artırılan dəqiqələrdə Halil Dervişoğlu qoyub. “Olimpiya” – “Qalatasaray”: 0-3.

Qeyd edək ki, “Qalatasaray” və “Olimpiya” klubları arasında cavab matçı avqustun 15-i İstanbulda keçiriləcək. Bu cütdə məğlub olan tərəf Avropa liqasının “play-off” mərhələsində “Qarabağ” və Finlandiyanın HİK kollektivləri arasında mübarizənin qalibi ilə qarşılaşacaq.

#UEFA Çempionlar Liqası