Çempionlar liqası: “Qarabağ” - “Rakuv” matçı

“Qarabağ” klubu UEFA Çempionlar liqasında növbəti görüşünü keçirib.

Azərbaycan çempionu II təsnifat mərhələsinin cavab matçında Polşanın “Rakuv” komandasını qəbul edib.

Bakı Olimpiya Stadionunda baş tutan oyunun ilk hissəsində təhlükəli vəziyyətlər yaransa da, hesab açılmayıb. 52-ci dəqiqədə isə qonaqlar irəli keçiblər. Fran Tüdor “köhlən atlar”ın qapısına yol tapıb. Ancaq “Qarabağ”ın cavabı özünü çox gözlətməyib. 1 saatın tamamında Redon Cica tarazlığı bərpa edib: 1-1.

Qalan vaxtda Ağdam klubu ardıcıl hücumlar təşkil etsə də, müdafiədə diqqətli olan “Rakuv” qapısını toxunulmaz saxlaya bilib.

Bu komandalar arasında ilk görüş Polşa təmsilçisinin 3-2 hesablı qələbəsi ilə yekunlaşdığı üçün 2 matçın yekununda “Rakuv” növbəti mərhələyə yüksəlib. “Qarabağ” isə yoluna Avropa liqasında davam edəcək. Komandamız bu yarışın III təsnifat mərhələsində Finlandiyanın HİK kollektivi ilə üz-üzə gələcək.