Çempionlar liqası: "Mançester Yunayted" - "Qalatasaray" matçı

Çempionlar liqasının A qrupunda yer alan “Qalatasaray” 2-ci turda İngiltərə səfərinə yollanıb.

“Old Trafford” arenasında “Mançester Yunayted”in qonağı olan “cim-bom” parlaq qələbə qazanıb. Hərçənd ki, matçda hesabı “qırmızı şeytanlar” açıblar. Rasmus Höylund yerli azarkeşləri sevindirib. Lakin Türkiyə nəhəngi fasiləyədək tarazlığı bərpa edə bilib. Vilfrid Zahanın zərbəsi dəqiq alınıb. 67-ci dəqiqədə Höylund dubl edib: 2-1.

Ancaq ruhdan düşməyən “sarı-qırmızılar” dönüş edə biliblər. Əvvəlcə Kərəm Aktürkoğlu bərabərliyi təmin edib. 78-ci dəqiqədə Mauro İkardi komandasını irəli çıxarmaq imkanı qazansa da, penaltidən fərqlənə bilməyib. Lakin az sonra səhvini düzəldərək İstanbul təmsilçisinə qələbəni gətirən qolu vurub. “Mançester Yunayted” – “Qalatasaray”: 2-3.

Xallarının sayını 4-ə çatdıran Türkiyə klubu A qrupunda 2-ci yerdədir. Komanda lider “Bavariya”dan 2 xal geri qalır. 1 xalı olan “Kopenhagen” 3-cü, xalsız qalan “Mançester Yunayted” isə 4-cü pillədədir.

Qeyd edək ki, “Qalatasaray” növbəti turda “Bavariya”nı qəbul edəcək. “Mançester Yunayted” isə “Old Trafford”da “Kopenhagen”lə üz-üzə gələcək.