Çempionlar Liqası: "Real Madrid" bu gün "Mançester Siti"ni qəbul edəcək

19 fevral 2025 293 baxış

Bu gün UEFA Çempionlar liqasında 1/8 finala yüksəlmək uğrunda daha 4 matç keçiriləcək.

Gecənin mərkəzi oyununda “Real Madrid” və “Mançester Siti” üz-üzə gələcəklər.

“Santyaqo Bernabeu” arenasında təşkil olunacaq görüş ərəfəsində “kral klubu”nun heyətində bir sıra itkilər var. Zədələrini yeni bərpa edən Antonio Rüdiger və David Alaba ilə yanaşı, Lukas Vaskesin meydana çıxması sual altındadır. Mankunianlarda isə Manuel Akanci və yeni transfer Vitor Reisin bərpa prosesi davam edir.

Madriddəki qarşılaşma ərəfəsində “los blankos” mərhələni adlamağa daha yaxın görünür. Belə ki, tərəflər arasında ilk matç İspaniya nəhənginin 3-2 hesablı qələbəsi ilə yekunlaşıb.

“Etihad”dakı oyunda Erlinq Holandın dubluna “Real” Kilian Mbappe, Braim Dias və Cud Bellingemin qolları ilə cavab vermişdi.

Rumıniyalı İştvan Kovaçın idarə edəcəyi və 1/8 finalın iştirakçısını müəyyənləşdirəcək cavab görüşü Bakı vaxtı ilə saat 23:55-də başlayacaq.

#Real Madrid FK