Çempionlar Liqasında 1/4 finalın 2 iştirakçısı məlum oldu

UEFA Çempionlar Liqasında 1/4 final mərhələsinin ilk iştirakçıları müəyyənləşib.

1/8 finalın Dortmundda keçirilən ilk görüşündə 0-1 hesabı ilə uduzan “Çelsi” Londondakı cavab matçında “Borussiya”ya 2 cavabsız qolla qalib gəlib.

“Stemford Bric” arenasında baş tutan qarşılaşmada hesabı fasilə ərəfəsində Sterlinq açıb. 2-ci yarının əvvəlində isə Haverts penaltini dəqiq yerinə yetirib. Beləliklə, 2 oyunun yekununda 2-1 hesabı ilə güclü olan “zadəganlar” 1/4 finala vəsiqə qazanıb.

Gecənin digər matçında isə 6 qol qeydə alınıb. Brügge səfərində eyni adlı komandanı 2-0 hesabı ilə məğlub edən “Benfika” Lissabonda da azarkeşlərini sevindirib. Portuqaliya təmsilçisinin heyətində Qonsalu Ramuş dubl edib. Rafa Silva, David Neres və Joao Mario isə hərəyə 1 dəfə fərqlənib. Belçika klubunun gücü yalnız Meyerin təsəlli topuna çatıb. “Benfika” - “Brügge”: 5-1.

Bununla da, 2 görüşün ümumi nəticəsində 7-1 hesabı ilə qalib gələn Lissabon komandası adını 1/4 finala yazdırıb.