Çempionlar liqasında 1/4 finalın 2 oyunu keçirildi

UEFA Çempionlar liqasında 1/4 final mərhələsinin ilk görüşlərinə yekun vurulub.

Yarışın son qalibi “Real Madrid” “Santyaqo Bernabeu” arenasında “Çelsi”ni qəbul edib. Oyunun favoriti olan “kral klubu” ehtimalları doğruldub.

Görüşdə hesabı 21-ci dəqiqədə Benzema açıb. Bununla da fransalı hücumçu qitənin 1 nömrəli klub turnirində 90-cı qolunu vurub. İlk yarı “los blankos”un minimal üstünlüyü ilə başa çatıb. 1 saatın tamamında “zadəganlar” azlıqda qalıb. Ben Çilvell birbaşa qırmızı vərəqə ilə cəzalandırılıb. 74-cü dəqiqədə isə Asensio londonluların qapısına yol tapıb. Qalan vaxtda başqa qol olmayıb. “Real Madrid” - “Çelsi”: 2-0. Bu komandalar arasında cavab oyunu aprelin 18-i İngiltərədə keçiriləcək.

Gecənin digər matçında isə İtaliya klubları üz-üzə gəliblər. “Milan” və “Napoli” arasında “San-Siro”da baş tutan görüşün taleyini 1 top həll edib. A Seriyasının 28-ci turunda neapolluları 4-0 hesabı ilə məğlub edən “rossoneri” bu dəfə İsmael Bennaserin qolu sayəsində minimal hesablı qələbə qazanıb. Qeyd edək ki, bu kollektivlər arasında cavab oyunu aprelin 18-i Neapolda olacaq.