Çempionlar liqasında 1/4 finalın daha 2 iştirakçısı məlum oldu

15 mart 2023 383 baxış

UEFA Çempionlar Liqasında 1/4 finalın daha 2 iştirakçısı müəyyənləşib.

Almaniyada keçirilən görüşdə 1-1 hesablı heç-heçəyə razılaşan “Leypsiq” və “Mançester Siti” bu dəfə İngiltərədə üz-üzə gəliblər. “Etihad Stedium”da baş tutan və şəhərlilərin 7-0 hesablı qələbəsi ilə yekunlaşan matçda Erlinq Holand 5 qolla diqqət çəkib. 22-ci dəqiqədə hesabı açan norveçli hücumçu qalan vaxtda daha 4 top vurub.

Penta-trik edən Erlinqlə yanaşı, “mankunianlar”ın heyətində İlkay Gündoğan və Kevin De Brüyne fərqlənib. Beləliklə, iki oyunun yekununda 8-1 hesabı ilə güclü olan “Mançester Siti” 1/4 finala adlayıb.

Digər görüşdə “Portu” və “İnter” klubları üz-üzə gəlib. 90 dəqiqə ərzində tərəflərin qol vurmaq imkanları olsa da, hesab açılmayıb. Komandalar arasında ilk matç “İnter”in 1-0 hesablı qalibiyyəti ilə başa çatdığı üçün İtaliya təmsilçisi 2 oyunun yekununda növbəti mərhələyə yüksəlib.

#UEFA Çempionlar Liqası