Çempionlar liqasında 1/4 finalın ilk görüşləri keçirildi

UEFA Çempionlar liqasında 1/4 final mərhələsinə start verilib. Gecənin ən böyük maraqla gözlənilən matçı “Mançester Siti” və “Bavariya” arasında olub.

“Etihad Stedium”da baş tutan görüş “şəhərlilər”in üstünlüyü şəraitində keçib. Hesab 27-ci dəqiqədə açılıb. Rodri uzaq məsafədən qapını dəqiq nişan alıb. 2-ci yarıda hücumlarını davam etdirən meydan sahibləri daha 2 qol vurublar. 70-ci dəqiqədə Bernardo Silva Holandın ötürməsindən sonra topu qapıya göndərib. 6 dəqiqə sonra isə Erlinq özü fərqlənib. Qalan vaxtda başqa qol olmayıb və “Siti” oyunda 3-0 hesablı qələbə qazanıb.

Digər qarşılaşmada “İnter” Portuqaliya çempionatının lideri “Benfika”nın qonağı olub. Lissabon təmsilçisinin öz meydanında ciddi müqavimət göstərəcəyi ehtimal olunsa da, görüş “neradzurri”nin qalibiyyəti ilə başa çatıb. Matçda qollar 2-ci hissədə vurulub. Barella və Lukakunun zərbəsi dəqiq olub. “Benfika” - “İnter”: 0-2.

Qeyd edək ki, həm “Mançester Siti” - “Bavariya”, həm də “Benfika” - “İnter” cütü arasında 1/4 finalın cavab matçı aprelin 19-u keçiriləcək.