Çempionlar Liqasında 1/8 final mərhələsi yekunlaşıb

UEFA Çempionlar liqasında 1/8 final mərhələsinə yekun vurulub.

1/4 finalın iştirakçılarından biri Madridin “Metropolitano” stadionunda keçirilən “Atletiko” – “İnter” matçında müəyyənləşib.

İlk görüşdə 1-0 hesabı ilə qalib gələn “neradzurri” 33-cü dəqiqədə Dimarkonun qolu ilə önə keçsə də, az sonra Qrizman tarazlığı bərpa edib. 87-ci dəqiqədə isə Depay İspaniya klubunu irəli çıxarıb: 2-1.

90 dəqiqənin yekununda iki qarşılaşmanın ümumi nəticəsinə görə hesab bərabər olduğundan əlavə vaxt oynanılıb. Ancaq tərəflər 30 dəqiqə ərzində fərqlənə bilməyiblər.

11 metrlik zərbələrdə isə “Atletiko” futbolçuları daha dəqiq olublar. Bununla da, Madrid təmsilçisi növbəti mərhələyə adlayıb.

1/4 finalın daha bir iştirakçısı Dortmundda yerli “Borussiya” və Niderlandın PSV komandalarının matçında məlum olub. Eyndhovendəki ilk qarşılaşmada 1-1 hesablı heç-heçə edən klubların budəfəki oyunu “sarı-qaralar”ın qələbəsi ilə yekunlaşıb. Sançonun erkən qolu ilə önə çıxan “Borussiya” Marko Roysun son dəqiqələrdə vurduğu topla iki oyunun yekununda 3-1 hesabı ilə güclü olub.

Beləliklə, 1/4 finala yüksələn kollektivlər bu cür müəyyənləşib: “Arsenal”, “Atletiko”, “Barselona”, “Bavariya”, “Borussiya”, “Mançester Siti”, “Pari Sen-Jermen”, “Real Madrid”.

Qeyd edək ki, növbəti mərhələnin püşkü martın 15-i İsveçrənin Nyon şəhərində atılacaq.