Çempionlar liqasında 1/8 finala yekun vurulub

UEFA Çempionlar Liqasında 1/8 final mərhələsinə yekun vurulub. “Enfild”də “Real”a 2-5 hesabı ilə uduzan “Liverpul” bu dəfə “Santyaqo Bernabeu” arenasında madridlilərin qonağı olub.

Fasiləyədək qapılar qarşısında təhlükəli vəziyyətlər yaransa da, ilk hissə qolsuz yekunlaşıb. 2-ci yarıda hücumlarını sürətləndirən “kral klubu” 78-ci dəqiqədə istəyinə nail olub. Kərim Benzema mersisaydlıların qapısına yol tapıb. Qalan vaxtda başqa qol olmayıb. Beləliklə, 2 görüşün ümumi nəticəsində 6-2 hesabı ilə qalib olan “Real” 1/4 finala yüksəlib.

İtaliyanın 2 təmsilçisi “Milan” və “İnter”dən sonra “Napoli” də 8 ən güclü kollektiv arasına qatılıb. “Dieqo Armando Maradona” stadionunda baş tutan “Napoli” - “Ayntraxt” oyunu neapolluların 3-0 hesablı qələbəsi ilə başa çatıb. Meydan sahiblərinin heyətində Viktor Osimhen dubl edib, daha bir epizodda isə Pyotr Zelinski penaltini dəqiq yerinə yetirib. Tərəflər arasında ilk qarşılaşmada “Napoli” 2-0 hesabı ilə güclü olduğu üçün komanda 2 matçın yekununda 1/4 finala adlayıb.