Çempionlar Liqasında 1/8 finalın daha 2 matçı keçirilib

Çempionlar Liqasında 1/8 final mərhələsinin ilk görüşündə “Napoli” ilə 1-1 hesablı heç-heçə edən “Barselona” cavab matçında inamlı qələbə qazanıb.

İspaniyada keçirilən oyunda 4 qol vurulub. Fasiləyədək “blauqrana”nın heyətində Fermin Lopez və Joao Kanselu, qonaqlardan isə Amir Rrahmani fərqlənib.

2-ci hissədə də üstünlüyünü qoruyan kataloniyalılar 83-cü dəqiqədə Robert Levandovskinin topu ilə görüşdə son nöqtəni qoyublar. Qarşılaşmada 3-1, ümumən isə 4-2 hesabı ilə güclü olan “Barsa” 1/4 finala adlayıb.

Digər matçda “Arsenal” komandası “Portu” ilə üz-üzə gəlib. 90 dəqiqə Leandro Trossardın yeganə qolu sayəsində 1-0 hesabı ilə bitib. Tərəflərin ilk görüşü “Portu”nun eyni hesablı qələbəsi ilə yekunlaşdığı üçün əlavə vaxta ehtiyac yaranıb. Burada da qalib müəyyənləşmədiyindən 11 metrlik zərbələrə müraciət olunub.

Penaltilər seriyasında isə “Arsenal” futbolçuları daha dəqiq olublar. Nəticədə London klubu 14 illk fasilədən sonra 1/4 finala vəsiqə qazanıb.