Çempionlar Liqasında 1/8 finalın daha 2 oyunu olacaq

12 mart 2024

Bu gün UEFA Çempionlar liqasında 1/4 finalın daha 2 iştirakçısı müəyyənləşəcək.

İtaliyadakı ilk görüşdə 1-1 hesablı heç-heçəyə razılaşan “Napoli” və “Barselona” bu dəfə İspaniyada qarşılaşacaqlar.

Oyun ərəfəsində “blauqrana”da ciddi itkilər var. Alehandro Balde, Qavi, Frenki de Yonq və Pedri zədəyə görə komandaya kömək edə bilməyəcəklər. Neapol klubu isə qarşılaşmaya tam heyətlə hazırlaşır.

Qeyd edək ki, Niderlanddan olan hakimlər briqadasının idarə edəcəyi görüşün start fiti saat 23:55-də veriləcək.

Portuqaliyadakı oyunda Qalenonun yeganə qolu sayəsində qalib gələn “Portu” isə Londonda “Arsenal”ın qonağı olacaq. “Emireyts” arenasında keçiriləcək matç ərəfəsində “topçular”dan Qabriel Martinelli və Takehiro Tomiyasu, “əjdahalar”dan isə Mehdi Tareminin meydana çıxması sual altındadır. Fransalı referi Kleman Türpenin idarə edəcəyi bu görüş də Bakı vaxtı ilə saat 23:55-də başlayacaq.

#UEFA Çempionlar Liqası