Çempionlar liqasında 1/8 finalın oyunları keçirilir

UEFA Çempionlar liqasında 1/8 finalın oyunları keçirilir.

Yarışın son qalibi “Real Madrid” mərhələnin ilk matçında “Atletiko”nu qəbul edib.

“Santyaqo Bernabeu” arenasında təşkil olunan görüşdə hesabı artıq 4-cü dəqiqədə Rodriqo açsa da, 32-ci dəqiqədə Xulian Alvares bərabərlik qolunu vurub. Bununla belə, “kral klubu” qarşılaşmadan qalib ayrılıb. Qələbə topunu 55-ci dəqiqədə Braim Dias aktivinə yazıb.

Gecənin ən məhsuldar oyununda “Arsenal” səfərdə PSV-ni darmadağın edib. 8 qolun qeydə alındığı matçda “topçular”ın norveçli ulduzu Martin Ödeqor dublla yadda qalıb. Onunla yanaşı, Yurriyen Timber, Etan Nvaneri, Mikel Merino, Leandro Trossard və Rikkardo Kalafiori fərqləniblər. PSV – “Arsenal”: 1-7.

Gözlənilmədən 1/8 finala qədər irəliləyən “Brügge” bu mərhələnin ilk görüşündə “Aston Villa” ilə bacarmayıb. Belçika klubunun meydanında keçirilən qarşılaşma İngiltərə təmsilçisinin 3-1 hesablı qələbəsi ilə yekunlaşıb.

Dortmunddakı “Siqnal İduna Park”da “Lill”i qəbul edən “Borussiya” isə Fransa komandasının müqavimətini qıra bilməyib. Oyun 1-1 hesabı ilə bitib.

Qeyd edək ki, 1/8 final mərhələsinin cavab matçları martın 11-i və 12-də təşkil olunacaq.