Çempionlar Liqasında 3-cü turun oyunları keçirilib

Çempionlar liqasının 2-ci turunda “Lans”a uduzan “Arsenal” bu dəfə “Sevilya”nın qonağı olub.

“Ramon Sançez Pisxuan” stadionundakı oyunda 3 qol vurulub. “Topçular”dan Qabriel Martinelli və Qabriel Jezuş, meydan sahiblərindən isə Nemanya Qudelin zərbəsi dəqiq alınıb.

2-1 hesablı qələbədən sonra 6 xalı olan “Arsenal” B qrupunda liderliyə yüksəlib. Komanda 2-ci yerdəki “Lans”ı 1 xal qabaqlayır.

Yarışın favoritlərindən “Real Madrid” də turu qələbə ilə tamamlayıb. Portuqaliyada “Braqa” ilə üz-üzə gələn “kral klubu” 2-1 hesabı ilə güclü olub. “Los blankos”dan Rodriqo və Cud Bellingemin toplarına “Braqa” yalnız Alvaro Calonun qolu ilə cavab verib.

C qrupunun digər matçında “Napoli” Berlin səfərində minimal hesabla “Union”a qalib gəlib. Qarşılaşmanın taleyini Cakomo Raspadorinin yeganə qolu həll edib. Bu nəticələrdən sonra “Real” maksimum göstərici ilə qrup lideridir. 6 xalı olan “Napoli” isə 2-ci yerdədir.

Ötən mövsüm finala qədər irəliləyən “İnter” də azarkeşlərini sevindirib. “Cuzeppe Meatsa” stadionunda “Zaltsburq”u qəbul edən “neradzurri” Aleksis Sançez və Hakan Çalhanoğlunun topları sayəsində 2-1 hesablı qələbə qazanıb.

“Zaltsburq”un yeganə qolunu isə Oskar Qlux vurub. Hərəyə 7 xal toplayan “İnter” və “Real Sosyedad” D qrupunda 1-ci, 2-ci yerləri bölüşdürürlər. “Zaltsburq” 3-cü, bütün görüşlərdə uduzan “Benfika” isə sonuncu pillədədir.