Çempionlar Liqasında 4-cü turun oyunları keçirilir

UEFA Çempionlar liqasının Liqa mərhələsində 4-cü turun maraqlı oyunlarından biri “Real Madrid” və “Milan” arasında olub.

“Santyaqo Bernabeu” arenasında keçirilən görüş “rossoneri”nin 3-1 hesablı qələbəsi ilə yekunlaşıb.

Qonaqların qollarını Malik Tşau, Alvaro Morata və Tiyani Reynders vurublar. “Los blankos”un yeganə topu penaltidən fərqlənən Vinisiusun aktivindədir.

Gözlənilməz nəticələrdən biri Portuqaliyada qeydə alınıb. Lissabon səfərində “Sportinq”lə üz-üzə gələn “Mançester Siti” Fil Fodenin qolu ilə hesabı açsa da, üstünlüyü qoruya bilməyib.

Meydan sahibləri Viktor Qyokereşin het-triki, eləcə də Maksimiliano Arauxonun dəqiq zərbəsi ilə “şəhərlilər”i 4-1 hesabı ilə məğlub edib.

Darmadağınla bitən daha bir qarşılaşma İngiltərədə keçirilib. “Bayer Leverkuzen”i qəbul edən “Liverpul” 4-0 hesablı qələbə qazanıb. “Enfild” arenasında təşkil olunan matçda Luis Diaz het-triklə diqqət çəkib. “Qırmızılar”ın digər qolunu niderlandlı forvard Kodi Qakpo vurub.

4 turdan sonra maksimum nəticəyə imza atan “Liverpul” hazırda Liqa mərhələsinə başçılıq edir.