Çempionlar Liqasında 4-cü turun oyunlarına yekun vurulub

Çempionlar Liqasında yoluna məğlubiyyətsiz davam edən “Real Madrid” doğma meydanında “Braqa” ilə üz-üzə gəlib.

“Santiaqo Bernabeu” stadionunda keçirilən oyunda 3 qol vurulub. “Kral klubu”nun heyətindən Braim Diaz, Rodriqo və Vinisius Junior fərqlənib. 3-0 hesablı qələbədən sonra xallarının sayını 12-yə çatdıran “Real” qrup lideridir. 3 xalı olan “Braqa” isə 3-cü yerdədir.

B qrupunun lideri “Arsenal” “Sevilya”nı qəbul edib. “Emireyts Stedium”da keçirilən görüş “topçular”ın 2-0 hesablı qələbəsi ilə bitib. Meydan sahiblərinin heyətindən Leandro Trossard və Bukayo Saka fərqlənib.

Qrupun digər qarşılaşmasında PSV və “Lans” komandaları üz-üzə gəlib. Matç meydan sahiblərinin 1-0 hesablı qələbəsi ilə bitib. Oyunda yeganə qolu Luk De Yonq vurub. “Topçular”dan 4 xal az toplayan PSV və “Lans” ardıcıl olaraq 3-cü, 4-cü pillələrdə qərarlaşıb. Heç bir oyunda qələbə qazana bilməyən “Sevilya” qrup sonuncusudur.

Ötən mövsüm finala qədər irəliləyən “İnter” bu dəfə də azarkeşlərini sevindirib. “Red Bull” arenada “Zaltsburq”un qonağı olan “neradzurri” 1-0 hesablı qələbə qazanıb. Görüşdə yeganə qolu 85-ci dəqiqədə Lautaro Martinez vurub. Hərəyə 10 xal toplayan “Real Sosyedad” və “İnter” D qrupunda 1-ci, 2-ci yerləri bölüşdürürlər. “Zaltsburq” 3-cü, bütün görüşlərdə uduzan “Benfika” isə sonuncu yerdədir.

Qeyd edək ki, baş tutan matçlardan sonra “Real Madrid”, “Real Sosyedad” və “İnter” 1/8 finala vəsiqəni rəsmiləşdiriblər.