Çempionlar Liqasında 7-ci turun növbəti matçları keçirilib

Çempionlar liqasının 7-ci turunda maraqla gözlənilən qarşılaşmalardan biri PSJ və “Mançester Siti” arasında olub. “Park de Prens” arenasında keçirilən oyun Fransa klubunun əzmkar qələbəsi ilə bitib.

“Şəhərlilər” 2-ci yarının əvvəlində Qriliş və Holandın qolları ilə 2-0 hesablı üstünlük qazansa da, meydan sahibləri Dembele, Barkolya, Joao Neveş və Qonsalu Ramuşun topları ilə dönüş ediblər. Qarşılaşma “Pari Sen-Jermen”in 4-2 hesablı qələbəsi ilə yekunlaşıb.

Yarışın son qalibi “Real Madrid” bu tur inamlı qalibiyyətə sevinib. “Zaltsburq”u qəbul edən “los blankos” 5-1 hesabı ilə güclü olub.

“Kral klubu”nun qollarını dubl edən Rodriqo və Vinisiusla yanaşı, Kilian Mbappe vurub. Avstriya klubunun yeganə topu isə Mads Bidstrupun aktivindədir.

Gözlənilməz nəticələrdən biri Niderlandda qeydə alınıb. “Feyenoord”un qonağı olan “Bavariya” 0-3 hesabı ilə məğlub olub. Rotterdamlıların heyətində Santyaqo Ximenes 2 qolla diqqət çəkib. Daha bir epizodda Ayase Ueda qapını dəqiq nişan alıb.

Qeyd edək ki, 7 turdan sonra Liqa mərhələsinin yarış cədvəlinə 21 xalla “Liverpul” başçılıq edir. 3 xal az toplayan “Barselona” 2-ci yerdədir. Bu komandalar növbəti raunda vəsiqəni təmin edib. 3-cü, 4-cü yerləri isə “Arsenal” və “İnter” bölüşdürürlər.