Çempionlar liqasında bütün yarımfinalçılar müəyyənləşdi

UEFA Çempionlar liqasında yarımfinalın son iştirakçıları müəyyənləşib.

İngiltərədə keçirilən matçda “Mançester Siti”yə 0-3 hesabı ilə uduzan “Bavariya” rəqibini “Alyans Arena”da qəbul edib. Qarşılaşma gözlənildiyi kimi ilk dəqiqələrdən gərgin mübarizə ilə əlamətdar olub. 37-ci dəqiqədə “şəhərlilər” penalti qazansalar da, Holand fərqlənə bilməyib. İlk hissə qolsuz yekunlaşıb.

Hesabı 57-ci dəqiqədə Erlinq Holand açıb. Bundan sonra “rekordmayster”in baş məşqçisi Tomas Tuxel ardıcıl əvəzetmələr etsə də, komanda yalnız 1 qol vura bilib. 83-cü dəqiqədə Yozua Kimmix 11 metrlik cərimə zərbəsini dəqiq yerinə yetirib: 1-1. Qalan vatxda başqa qol olmayıb və 2 görüşün yekununda 4-1 hesabı ilə güclü olan “Mançester Siti” yarımfinalda “Real Madrid”ə rəqib olub.

Gecənin digər oyununda isə 6 qol vurulub. “İnter” və “Benfika” arasında “Cuzeppe Meatsa” arenasındakı matçda ilk yarı Barella və Eursnesin qarşılıqlı qolları ilə 1-1 hesabı ilə bitib. 2-ci hissədə “neradzurri” Lautaro və Xoakin Korreanın topları ilə 3-1 hesablı üstünlük qazansa da, “Benfika” vəziyyəti dəyişə bilib. 86-cı dəqiqədə Antonio Silva, artırılan dəqiqələrdə isə Petar Musa fərqlənib: 3-3.

Tərəflər arasında ilk görüş “İnter”in 2-0 hesablı qələbəsi ilə başa çatdığı üçün 2 oyunun yekununda İtaliya təmsilçisi yarımfinala yüksəlib. Baş məşqçi Simone İnzaqinin kollektivi bu mərhələdə əzəli rəqibi “Milan”la üz-üzə gələcək.

Qeyd edək ki, yarımfinalın ilk matçları mayın 9-u, cavab qarşılaşmaları isə mayın 16-sı keçiriləcək.