Çempionlar liqasında ən yaxşıların adları açıqlandı

Çempionlar Liqasında 2022/2023-cü illər mövsümünün ən yaxşıları açıqlanıb.

Yarışın ən yaxşı futbolçusu adına “Mançester Siti”nin ispaniyalı üzvü Rodri layiq görülüb. Turnirin finalında yeganə qolu vuraraq komandasına kuboku qazandıran yarımmüdafiəçi ümumən yarışda 12 oyun keçirib və 2 topla yadda qalıb.

“Siti”nin daha bir oyunçusu Erlinq Holand isə ən sərrast futbolçu adına yiyələnib. Norveçli hücumçu 11 matçda 12 qol vurmaqla turnirin bombardiri seçilib.

Qeyd edək ki, UEFA həm də yarışın rəmzi 11-liyini açıqlayıb. Bu komandanın 7 oyunçusu çempion “Mançester Siti”nin şərəfini qoruyur. “Şəhərlilər”dən Ruben Diaş və Kayl Volker müdafiə, Rodri, Con Stounz və Kevin De Brüyne yarımmüdafiə, Erlinq Holand və Bernardo Silva isə hücumda mövqe tutub. Bundan başqa, rəmzi heyətdə “Real”dan Tibo Kurtua və Vinisius Junior, “İnter”dən isə Federiko Dimarko və Alessandro Bastoniyə yer verilib.