Çempionlar liqasında ilk finalçı məlum oldu

17 may 2023 208 baxış

UEFA Çempionlar liqasında 2022/2023-cü illər mövsümünün ilk finalçısı məlum olub.

“Cuzeppe Meatsa” arenasındakı yarımfinalın ilk matçında “Milan”ı 2-0 hesabı ilə məğlub edən “İnter” bu dəfə rəqibini nominal ev sahibi kimi qəbul edib. Fasiləyədək qapılar qarşısında təhlükəli vəziyyətlər yaransa da, ilk hissədə hesab açılmayıb.

2-ci yarıda təşəbbüsə yiyələnən “neradzurri” 74-cü dəqiqədə “rossoneri”lərin qapısına yol tapıb. Lautaro Martinez fərqlənib. Qalan vaxtda sərfəli nəticəni qoruyan “İnter” 2 oyunun yekununda 3-0 hesablı qələbə qazanaraq tarixində 6-cı dəfə Çempionlar liqasının finalına adlayıb.

Qeyd edək ki, yarışın 3 qat qalibi olan “neradzurri” sonuncu dəfə 2010-cu ildə qitənin 1 nömrəli klub turnirində final oynayıb. Həmin vaxt Joze Mourinyonun baş məşqçisi olduğu kollektiv həlledici görüşdə “Bavariya”nı 2-0 hesabı ilə məğlub edərək fəxri mükafatın sahibi olub.

#UEFA Çempionlar Liqası