Çempionlar liqasında ilk finalçı müəyyənləşir

Mayın 16-sı UEFA Çempionlar liqasında ilk finalçı müəyyənləşəcək.

Yarımfinalın birinci matçında əzəli rəqibi “Milan”ı 2-0 hesabı ilə məğlub edən “İnter” cavab görüşündə də sərfəli nəticə əldə edərək həlledici oyuna vəsiqə qazanmaq niyyətindədir. Dönüş etmək məcburiyyətində olan “rossoneri”lərdə qarşılaşma ərəfəsində müəyyən itkilər var.

Belə ki, Alessandro Florensi, Rade Kruniç və Junior Messias zədəyə görə matçı buraxa bilərlər. Nominal ev sahibi olan “neradzurri”də isə Milan Şkrinyar zədəlidir. Bundan başqa, Xoakin Korreanın da meydana çıxması sual altındadır.

Maraq üçün deyək ki, yarımfinalın cavab matçı ərəfəsində “İnter” daha yaxşı formadadır. Baş məşqçi Simone İnzaqinin kollektivi bütün turnirlərdə son 7 oyunu qalib tamamlayıb. “Rossonerilər” isə son 2 qarşılaşmada məğlub olublar.

Qeyd edək ki, “Cuzeppe Meatsa” arenasında keçiriləcək “İnter” - “Milan” görüşü Bakı vaxtı ilə saat 23:00-da başlayacaq. Oyunda ədalət prinsiplərini Kleman Türpenin başçılıq etdiyi fransalı hakimlər briqadası qoruyacaq.