Çempionlar liqasında qrup mərhələsinin son oyunları olub

UEFA Çempionlar liqasında qrup mərhələsinə yekun vurulub.

6-cı turun maraqlı oyunlarından biri “Antverpen” və “Barselona” arasında olub. 5 qolun qeydə alındığı matçda qələbəni Belçika təmsilçisi bayram edib. “Antverpen”dən Artur Vermeren, Vinsent Yanssen və Corc İlenixananın zərbələri dəqiq olub. “Blauqrana”nın gücü isə ancaq Ferran Torres və Mark Qiunun toplarına çatıb. 2-3 hesabı ilə uduzmasına baxmayaraq, “Barsa” H qrupunun qalibi kimi 1/8 finala yüksəlib.

“Portu” və “Şaxtyor” arasında baş tutan qrupun digər matçında 8 qol vurulub. “Draqao” stadionunda keçirilən görüşdə “əjdahalar” 5-3 hesabı ilə qalib gəliblər. “Portu”nun heyətində Qaleno ilə yanaşı, Mehdi Taremi, Pepe və Flavio Konseysao fərqlənib. Bu nəticədən sonra Portuqaliya klubu H qrupunu “Barsa”nın ardından 2-ci yerdə tamamlayaraq “pley-off”a adlayıb.

Dortmundda yerli “Borussiya” və “Pari Sen-Jermen” arasında oyun da gərginliyi ilə diqqət çəkib. Meydan sahibləri 51-ci dəqiqədə Kərim Adeyemenin qolu ilə önə çıxsalar da, çox keçmədən Varren Zair-Emeri tarazlığı bərpa edib. Qalan vaxtda başqa qol olmayıb və 1-1 hesabı ilə bitən görüşdən sonra “Borussiya” F qrupunu 1-ci, PSJ isə 2-ci yerdə tamamlayıb.

Bu qrupun digər qarşılaşmasında “Milan” səfərdə “Nyukasl”ı məğlub edib. “Sent-Ceyms Park”dakı matçda “sağsağanlar” ilk hissəni Joelinqtonun qolu ilə öndə tamamlasa da, “rossoneri” fasilədən sonra Pulişiç və Çukvuezenin topları ilə 2-1 hesabı ilə qalib gələrək, Avropa liqasında çıxış hüququ əldə edib.