Çempionlar Liqasında yarımfinalın ilk iştirakçıları müəyyənləşdi

UEFA Çempionlar Liqasında yarımfinalın ilk iştirakçıları müəyyənləşib.

“Santyaqo Bernabeu” arenasındakı 1-ci matçda “Çelsi”yə 2-0 hesabı ilə qalib gələn “Real” Londonda da qələbə qazanıb. “Stemford Bric” stadionunda keçirilən görüşdə hesab 2-ci hissədə açılıb. 58-ci dəqiqədə Rodriqo “kral klubu”nu irəli çıxarıb. Bundan sonra “zadəganlar” vəziyyəti dəyişməyə çalışsa da, hücumları nəticə verməyib. Əvəzində 80-ci dəqiqədə Rodriqo 2-ci topu londonluların qapısından keçirib. “Çelsi” - “Real”: 0-2. Beləliklə, 2 oyunun yekununda 4-0 hesabı ilə güclü olan "Real" növbəti mərhələyə yüksəlib.

Digər qarşılaşmada “Napoli” və “Milan” üz-üzə gəlib. “Dieqo Maradona” stadionunda baş tutan matç sülhlə bitib. 22-ci dəqiqədə qonaqlar penalti vurmaq imkanı qazansa da, Jiru fərqlənə bilməyib. Bununla belə Olivye 43-cü dəqiqədə komandasının hücumunu qolla tamamlayıb. İlk hissə “rossoneri”nin minimal üstünlüyü ilə yekunlaşıb.

82-ci dəqiqədə “Milan”ın qapısına 11 metrlik cərimə zərbəsi təyin olunsa da, Kvaratsxeliya fürsəti qaçırıb. Əsas vaxta artırılan dəqiqələrdə isə Viktor Osimhen tarazlığı bərpa edib: 1-1. Ancaq bu qol “Napoli”yə mərhələ adlamağa kifayət etməyib. “San Siro”dakı ilk oyunda 1-0 hesabı ilə qalib gələn “Milan” 16 ildən sonra Çempionlar Liqasında yarımfinala yüksəlib.