Çempionlar liqasının yarımfinalında "Milan" derbisi

UEFA Çempionlar liqasında yarımfinalın ilk görüşlərinə İtaliyada yekun vurulacaq. Əzəli rəqiblər – “Milan” və “İnter” “San-Siro” stadionunda münasibətlərə aydınlıq gətirəcəklər.

Yarışın 7 qat qalibi olan “rossoneri”nin nominal ev sahibi olduğu oyundan əvvəl “İnter” daha yaxşı formadadır. “Neradzurri” bütün turnirlərdə son 5 qarşılaşmada qalib gəlib. 9 matçdır məğlub olmayan “Milan” isə bu müddət ərzində 5 dəfə heç-heçə edib, 4 dəfə qələbə qazanıb.

Komandalar arasında cari mövsümdə keçirilən görüşlərə gəldikdə, 3 oyunun 2-də “İnter”, 1-də isə “Milan” qələbəni bayram edib. Budəfəki oyun ərəfəsində qonaqların heyətində əsas itki Milan Şkrinyarla bağlıdır. Slovakiyalı müdafiəçi zədələndiyi üçün komandasına kömək edə bilməyəcək.

Bundan başqa, “İnter”dən Danilo Dambrozio və Robin Qozens, “Milan”dan isə Rafael Leau eyni səbəbdən meydana çıxmaya bilər.

Qeyd edək ki, “Milan” və “İnter” arasında yarımfinal qarşılaşması Bakı vaxtı ilə saat 23:00-da başlayacaq. Oyunda ədalət prinsiplərini Xesus Xil Mansanonun rəhbərlik etdiyi ispaniyalı hakimlər briqadası qoruyacaq.