Cüdo üzrə dünya çempionu Zelim Kotsoyev vətənə dönüb

24 may 2024

Əbu-Dabidə keçirilən dünya çempionatında qızıl medal qazanan cüdoçumuz Zelim Kotsoyev vətənə dönüb.

İdmançımız Heydər Əliyev adına Beynəlxalq Hava Limanında böyük coşqu ilə qarşılanıb.

Zelim Kotsoyev jurnalistlərə açıqlamasında həmişə dünya çempionu olmağı arzuladığını bildirib:

“Şəxsi məşqçim Elxan Məmmədov mənə “sən bunu bacara bilərsən, məşqlərə ciddi yanaş, rejimə əməl et” deyirdi. Bu yarışda çempion olduqdan sonra Hidayət mənə yaxınlaşaraq “görürsən, bu, mümkündür” sözlərini dedi. O mənə böyük motivasiya verdi.

Çox xoşbəxtəm ki, qızıl medal qazanmağa və Azərbaycanın himninin səsləndirilməsinə nail oldum. 2016-cı ildən buradayam və 3 rəngli bayrağımızı dalğalandırmaq üçün daim əlimdən gələni edirəm. Çalışacağam ki, olimpiadada da uğurla çıxış edib, fəxri kürsünün ən yüksək pilləsinə qalxım”.

Qeyd edək ki, 100 kq çəki dərəcəsində yarışan Zelim Kotsoyev dünya çempionatının finalında kanadalı Şadi Elnahası məğlub edərək 1-ci yeri tutub.

#Cüdo