Cüdoçularımız Avropa kubokunda 8 medal qazanıblar

Cüdo üzrə Azərbaycan millisi Xorvatiyada keçirilən böyüklər arasında Avropa Kubokunda parlaq nəticəyə imza atıb.

Yığmamız Dubrovnik şəhərində təşkil olunan yarışda 3-ü qızıl, 2-si gümüş və 3-ü bürünc olmaqla, ümumən 8 medal qazanıb.

Təmsilçilərimizdən 90 kq çəkidə çıxış edən Murad Fətiyev kişilərin mübarizəsində, müvafiq olaraq 52 və 57 kiloqramda yer alan Aydan Vəliyeva və Fidan Əlizadə isə qadınların turnirində fəxri kürsünün ən yüksək pilləsinə qalxıb.

Finalda Aydan Vəliyevaya uduzan Gültac Məmmədəliyeva və 81 kiloqramda qüvvəsini sınayan Kərim Allahverdiyev gümüş mükafatla kifayətlənib.

Daha 3 nümayəndəmiz ‒ Kamran Süleymanov, Vüqar Talıbov və Nərmin Əmirli isə bürünc medalın sahibi olub.

Beləliklə, turniri 8 mükafatla başa vuran komandamız Avropa kubokunu 1-ci pillədə tamamlayıb.

Qeyd edək ki, aprelin 5-dən 6-na qədər davam edən yarışda 39 ölkədən 413 cüdoçu mübarizə aparıb.