Cüdoçumuz Hidayət Heydərov karyerasında ilkə imza atıb

Ölkəmizin məşhur idmançılarından Hidayət Heydərov cüdo üzrə dünya çempionu olub.

O bu uğura Birləşmiş Ərəb Əmirliklərində təşkil olunan turnirdə nail olub.

Əbu-Dabidə keçirilən yarışda əvvəlcə Kosovo təmsilçisini məğlub edən Hidayət növbəti mərhələlərdə İspaniya, Braziliya və Almaniya nümayəndələrindən güclü olub. Həlledici görüşdə isə H.Heydərov yaponiyalı Tatsuki İşihara ilə üz-üzə gəlib. Finalı da qalib başa vuran idmançımız karyerasında ilk dəfə dünya çempionu olub.

Qeyd edək ki, daha əvvəl 3 dəfə dünya çempionatlarında bürünc mükafat əldə edən Hidayət Heydərov həm də 4 qat Avropa çempionudur. Dəfələrlə Böyük Dəbilqə və Qran-pri turnirlərini qazanan 26 yaşlı cüdoçu Bakı-2017 İslam Həmrəyliyi Oyunlarının da qalibidir.