Daha 4 komanda Çempionlar liqasının 1/8 finalında

UEFA Çempionlar liqasının qrup mərhələsində 5-ci turun oyunları keçirilir.

“San-Siro” stadionunda “Borussiya Dortmund”u qəbul edən “Milan” 6-cı dəqiqədə hesabı açmağa yaxın olsa da, Jiru penaltidən fərqlənə bilməyib. Çox keçmədən qonaqlar da 11 metrlik cərimə zərbəsi qazanıblar və Roys fürsəti qaçırmayıb.

“Rossoneri” fasiləyədək Çukvuezinin qolu ilə tarazlığı bərpa etsə də, dortmundlular 2-ci yarıda Bayno-Qittens və Adeyeminin topları ilə yekunda 3-1 hesabı ilə qalib gəliblər. Bu nəticədən sonra F qrupunda 10 xalı olan “Borussiya” 1/8 finala adlayıb.

Qrupun digər görüşündə PSJ “Nyukasl”la mübarizədə son saniyələrdə məğlubiyyətdən xilas olub. “Park de Prens”dəki oyunda “sağsağanlar” İsakın qolu ilə 24-cü dəqiqədə önə keçsələr də, qarşılaşmanın sonlarında Mbappe penaltidən hesabı bərabərləşdirə bilib. 5 turdan sonra 7 xalı olan “Pari Sen-Jermen” F qrupunda 2-ci yerdədir. Hərəyə 5 xalı olan “Nyukasl” və “Milan” isə 3-cü, 4-cü yerləri bölüşdürürlər.

Növbəti mərhələyə yüksələn daha bir kollektiv “Barselona” olub. “Portu”nu qəbul edən “blauqrana” Pepenin qolundan sonra hesabda geriyə düşsə də, Kanselo və Joao Felişin dəqiq zərbələri kataloniyalılara 2-1 hesablı qalibiyyət gətirib. Xallarının sayını 12-yə çatdıran “Barsa” H qrupunda lider olmaqla yanaşı, “pley-off”a yüksəlib.

İspaniyanın daha bir təmsilçisi “Atletiko” da adını 1/8 finala yazdırıb. Rotterdamda “Feyenoord”un qonağı olan madridlilər 2 avtoqol və Ermosonun topu sayəsində 3-1 hesablı qələbə qazanıblar.

E qrupunun digər görüşündə isə “Latsio” komandası “Seltik”i 2-0 hesabı ilə məğlub edib. İmmobilenin dublu ilə əlamətdar olan matçdan sonra “Latsio” da 1/8 finala vəsiqəni təmin edib. 3-cü yeri tutan “Feyenoord”un isə Avropa liqasında çıxış edəcəyi dəqiqləşib.