Daha bir futbol ulduzu Səudiyyə Ərəbistanını seçdi

A Seriyasının ulduz futbolçularından Sergey Milinkoviç-Saviç karyerasını Səudiyyə Ərəbistanında davam etdirəcək.

İtaliyalı insayder Fabritsio Romanonun məlumatına əsasən, 28 yaşlı yarımmüdafiəçi “Əl-Hilal” komandasına qoşulacaq.

Bildirilir ki, sözügedən klub Milinkoviç-Saviçin çıxış etdiyi “Latsio”ya 40 milyon avro ödəyəcək. Yeni kollektivi ilə 3 illik müqavilə imzalayacaq serbiyalı oyunçunun məvacibi isə 20 milyon avro olacaq.

Qeyd edək ki, 2015-ci ildən “Latsio”nun şərəfini qoruyan Sergey “byankoselesti” forması ilə 341 matçda 69 qol vurub. Roma təmsilçisi ilə İtaliya kuboku və superkubokunu qazanan futbolçu ayrı-ayrı vaxtlarda dünya nəhənglərinin də maraq dairəsində olub.

Belə ki, “Yuventus” və “Mançester Yunayted” Milinkoviç-Saviçi heyətinə qatmağa çalışsa da, transfer məbləği baxımından razılıq əldə edə bilməyiblər.