Döyüşçümüz Nazim Sadıxov UFC-də parlaq qələbə qazandı

Azərbaycanlı MMA döyüşçüsü Nazim Sadıxov UFC-də növbəti görüşünü keçirib.

O, "UFC Veqas 77" turniri çərçivəsində amerikalı Terrens Makkinni ilə üz-üzə gəlib. Görüş 2 raund davam etsə də, gərginliyi ilə yadda qalıb. Lakin sonda idmançımız qalib gəlməyi bacarıb. Nazim 2-ci raundun yekununda boğucu fəndi uğurla tətbiq edərək rəqibini məğlub edib. Bu, N.Sadıxovun UFC-də 2-ci, ümumən isə MMA karyerasında 9-cu qələbəsidir.

Xatırladaq ki, N.Sadıxov UFC-dəki debüt görüşünü "UFC Fight Night 219" turniri çərçivəsində keçirib. Amerikalı Evan Elderlə üz-üzə gələn idmançımız qarşılaşmadan qalib ayrılıb.

Əlavə edək ki, Nazim UFC-də mübarizə aparan Azərbaycan əsilli 2-ci döyüşçüdür. Sözügedən təşkilatda Azərbaycan bayrağı ilə çıxış edən digər MMA ustası Rafael Fiziyevdir.