Dünya çempionu adı uğrunda Tayson Fyuri və Oleksandr Usik qarşılaşıb

Səudiyyə Ərəbistanının paytaxtı Ər-Riyadda təşkil olunan boks gecəsində ağır çəkidə mütləq dünya çempionu müəyyənləşib.

Həlledici döyüşdə karyeraları ərzində uduzmayan iki idmançı – britaniyalı Tayson Fyuri və ukraynalı Oleksandr Usik üz-üzə gəliblər.

Gərgin keçən görüş ərzində O.Usik daha çox fəallıq nümayiş etdirib. Nəticədə ukraynalı dəri əlcək ustası 9-cu raundda rəqibini nokdauna salıb. Ancaq T.Fyuri döyüşü davam etdirə bilib. Bununla belə, 12 raund davam edən mübarizənin yekununda O.Usik hakimlərin qərarına əsasən qalib elan olunub.

Daha əvvəl Entoni Coşuanı məğlub edərək WBA, WBO və IBF versiyalarında kəmər qazanan ukraynalı idmançı WBC versiyasında da kəmərə yiyələnib.

Beləliklə, Oleksandr Usikin qələbəsi nəticəsində 25 illik fasilədən sonra ağır çəkidə boks üzrə mütləq dünya çempionunun adına aydınlıq gəlib. Sonuncu dəfə bu uğura 1999-cu ildə Evander Xolifildi məğlub edən Lennoks Lyuis nail olmuşdu.

Qeyd edək ki, Oleksandr Usik və Tayson Fyurinin döyüş üçün imzaladığı müqaviləyə əsasən, tərəflər arasında revanş görüşü nəzərdə tutulub. Sözügedən döyüş bu il oktyabrın 12-də təşkil olunacaq.