Eduard Məmmədovun yetirmələri Türkiyədə qızıl medal qazandı

Noyabrın 19-dan 25-dək Türkiyənin Antalya şəhərində hərbi kikboksinq üzrə 1-ci “CISM” açıq çempionatı keçirilir.

Yarışda Azərbaycanı təmsil edən Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı, dəfələrcə dünya və Avropa çempionu olan Eduard Məmmədovun tələbələri “Ağ canavar” ləqəbli Amin Quliyev və “Tayson” ləqəbli Elvin Məmmədov qızıl medal qazanıblar.

Amin Quliyev 67 kiloqram çəki dərəcəsində Ekvador təmsilçisi, finalda isə Türkiyə idmançısı Emre Korkmaz üzərində qələbə qazanaraq çempion olub. Elvin Məmmədov isə 54 kiloqram çəki dərəcəsində əvvəlcə Tailand, finalda isə Türkiyə idmançısı Bilal Duralı məğlub edərək fəxri kürsüyə yüksəlib.

Türkiyə, Özbəkistan, Qazaxıstan, Almaniya, Fransa da daxil olmaqla ümumilikdə 11 ölkə arasında keçirilən çempionatda Eduard Məmmədov ən mükəmməl məşqçi adına layiq görülüb.

Qeyd edək ki, yarışda Azərbaycan Kikboksinq Federasiyasının milli komandası ümumilikdə 7 qızıl, 1 gümüş ve 4 bürünc medal qazanıb. Tələbələrini təbrik edən Eduard Məmmədov onlara gələcək yarışlarda uğurlar arzulayıb.

Əldə olunan qələbənin şəhidlərimizə həsr edildiyini qeyd edərək onlara Allahdan rəhmət diləyib. Eduard Məmmədov başda Suraxanı rayon icra başçısı, Azərbaycan Kikboksinq Federasiyasının fəxri prezidenti Adil Əliyevə, Federasiyanın prezidenti Orxan Əliyevə, baş məşqçi Elşən Abdulrəhimova və “Ağ canavar” klubunun məşqçisi Ayaz Mehdiyevə təşəkkürlərini bildirib.