Hansı futbolçuya 1 milyard avroluq maaş təklif olundu?

Dünya futbolunun superulduzları, mövsümün sonunda müqavilələri başa çatacaq Lionel Messi və Kərim Benzema Səudiyyə Ərəbistanı klublarından fantastik təkliflər alıblar.

Belə ki, Kriştiano Ronaldonun çıxış etdiyi “Əl-Nəsr”in əsas rəqiblərindən olan “Əl-Hilal” L.Messiyə 2 illik müqavilə və 1.2 milyard avro məvacib təklif edib.

Son xəbərlərə əsasən, futbolçunun atası və eyni zamanda agenti Xorxe Messi Leoya bu təklifi qəbul etməyi məsləhət görüb. Forvard özü isə hələ ki tərəddüd edir və “Barselona” ilə danışıqların nəticəsini gözləyir.

Son illərdə “Real”ın əsas qol silahı olan Kərim Benzema da Səudiyyə Ərəbistanından təklif alıb. Mediada yayılan məlumata görə, bu ölkənin klublarından biri 35 yaşlı hücumçuya 2 illik müqavilə üçün 400 milyon avro ödəməyə hazırdır. Ancaq L.Messi kimi, K.Benzema da yekun qərarını verməyib.

“Real” ötən il “Qızıl top” mükafatını qazanan futbolçunu komandada saxlamaq istəsə də, Kərim yeni mövsümdə ehtiyatda qalacağını ehtimal edir. Bu səbəbdən K.Benzemanın yekunda ərəb klubunun təklifini qəbul edəcəyi gözlənilir.