“Fənərbağça” İstanbul derbisində darmadağınla qələbə qazandı

Türkiyə super liqasında 3-cü turdan təxirə salınan matçda “Fənərbağça” komandası “Başakşehir”i darmadağın edib.

“Şükrü Saracoğlu” stadionunda keçirilən oyunda hesab artıq 5-ci dəqiqədə açılıb. Meydan sahiblərindən Aleksander Djiku ilk qola imza atıb. 5 dəqiqə sonra qonaqların üzvü Leo Duarte avtoqol müəllifi olub: 2-0.

Bundan sonra da hücumlarını davam etdirən “Fənər” 20-ci dəqiqədə fərqi 3-ə yüksəldib. Bu dəfə Sebastyan Şimanski azarkeşləri sevindirib. İstanbul nəhəngi fasiləyə 3-0 hesablı üstünlüklə yollanıb.

2-ci yarı da “Fənərbağça”nın üstünlüyü şəraitində keçib. 80-ci dəqiqədə Şimanski özünün 2-ci komandasının isə 4-cü qolunu vurub. “Fənərbağça” – “Başakşehir”: 4-0.

Bütün yarışlarda ardıcıl 13-cü qələbəsini qazanan “Fənər” 18 xalla turnir cədvəlinə başçılıq edir. Komanda 2-ci yerdəki son çempion “Qalatasaray”ı 2 xal qabaqlayır.