“Fənərbağça”nın ulduzu klubdan getməyə yaxındır

Cari mövsümün sonunda “Fənərbağça”da gözlənilməz ayrılıq yaşana bilər.

Türkiyə mətbuatında yayılan məlumata görə, komandanın ulduzlarından Edin Ceko bu yay klubdan gedəcək.

Son xəbərlərə görə, 38 yaşlı hücumçu Səudiyyə Ərəbistanı kollektivlərinin maraq dairəsindədir. İddia olunur ki, təcrübəli futbolçu özü də keçidə müsbət yanaşır.

Qeyd edək ki, E.Ceko ötən ilin yayından İstanbul təmsilçisinin şərəfini qoruyur. Azad agent kimi cəlb olunan forvard Türkiyə təmsilçisinin heyətində 44 matçda 24 qolla yadda qalıb.

Xatırladaq ki, dövrünün ən istedadlı hücumçuları arasında göstərilən Edin Ceko karyerası ərzində “Volfsburq”, “Mançester Siti”, “Roma” və “İnter” kimi klublarda çıxış edib. Bu komandalarda oynadığı müddətdə Almaniya və İngiltərə çempionatını, eləcə də İtaliya Kuboku və Super Kubokunu qazanan E.Ceko ölkəsinin də futbol əfsanəsidir.

Bosniya və Herseqovina yığmasında 134 matç keçirən və 65 qol vuran Edin hər iki göstəricidə millinin rekorduna sahibdir.