Formula 1-də mövsümün 5-ci yarışı arxada qalıb

"Maklaren" komandasının avstraliyalı pilotu Oskar Piastri "Formula-1" üzrə dünya çempionatının beşinci mərhələsi ‒ Səudiyyə Ərəbistanı Qran-prisinin qalibi olub.

Sözügedən yarış Ciddənin şəhərdaxili trasında keçirilib. İkinci yeri "Red Bull"un niderlandlı pilotu Maks Ferstappen tutub.

İlk üçlüyü "Ferrari"nin monakolu pilotu Şarl Lekler tamamlayıb. 99 xal toplayan 24 yaşlı avstraliyalı pilot çempionatın ümumi hesablamasında liderlik edir.

İkinci yerdə 89 xalla onun komanda yoldaşı britaniyalı Lando Norris qərarlaşıb. Son dörd mövsümün çempionu Maks Ferstappen isə 87 xalla ilk üçlüyü qapayıb.

Qeyd edək ki, mühəndislər kuboku uğrunda mübarizədə "Maklaren" 188 xalla birinci yerdədir. Üçlüyə həmçinin 111 xalla "Mersedes" və aktivində 89 xal olan "Red Bull" daxildir. "Formula-1" çempionatının altıncı mərhələsi olan Mayami Qran-prisinin qalibi mayın 4-də müəyyənləşəcək.