Futbol matçında yumurta döyüşdürülməsi

Litva çempionatında “Banqa” və “Kauno Jalgiris” komandaları arasında matçdan əvvəl maraqlı hadisə yaşanıb.

Belə ki, görüşün baş hakimi Donatas Rumsas futbolçulara püşk zamanı qəpik əvəzinə Pasxa bayramı üçün bəzədilən yumurtalardan istifadə etməyi təklif edib. Oyunçular isə referinin təklifini qəbul edərək yumurta döyüşdürüblər. Görüntülər futbolsevərlər və sosial şəbəkə istifadəçiləri tərəfindən maraqla qarşılanıb.

Qeyd edək ki, kadrların qeydə alındığı 7-ci turun “Banqa” - “Kauno Jalgiris” matçı qonaqların 2-0 hesablı qələbəsi ilə yekunlaşıb. Görüşdə hər iki qolu Kaunas təmsilçisinin fransalı legioneri Florian David vurub. Qalibiyyətdən sonra xallarının sayını 12-yə çatdıran “Kauno Jalgiris” hazırda 3-cü yerdədir. Komanda lider Panevejisdən 7 xal geri qalır. 4 oyundur qələbəyə həsrət olan “Banqa” isə 4 xalla 9-cudur.