Futbol ulduzlarından Türkiyəyə böyük dəstək

Türkiyə və Suriyada baş verən zəlzələ ilə əlaqədar futbol ictimaiyyətindən də dəstək gəlməyə davam edir.

Türkiyə millisinin və "Yuventus"un üzvü Merih Demiral ölkəsinə dəstək üçün şəxsi kolleksiyasında olan Kriştiano Ronaldonun imzalı formasını hərraca çıxarıb. O, satışdan əldə olunacaq gəlirin zəlzələdən zərər çəkənlərə bağışlanacağını bildirib.

Bununla əlaqədar tviterdə paylaşım edən Merih Ronaldo ilə danışdığını və portuqaliyalı ulduzun Türkiyədə baş verənlərə çox kədərləndiyini bildirib.

Bundan başqa, dünya futbolunun digər məşhur simaları da təbii fəlakətdən zərər çəkən ölkələrə dəstək olublar. Braziliyalı əfsanə Kaka sosial media hesabında Türkiyə ilə Suriyadan çox üzücü xəbərlər gəldiyini, ürəyinin və düşüncələrinin zəlzələdən zərər çəkən insanların yanında olduğunu yazıb.

“Qalatasaray”ın sabiq ulduzu Felipe Melo videomüraciətlə ikinci vətəni adlandırdığı Türkiyəyə başsağlığı verib. “Fənərbağça”nın əfsanəsi Aleks de Souza isə Türkiyənin acısını paylaşdığını və yaralılara şəfa dilədiyini bildirib.

“Roma” klubunun çalışdırıcısı Joze Mourinyo da təbii fəlakətdən zərər çəkənlərə dəstək olub. O, “Instagram” hesabının hekayə bölməsində həmkarı Fatih Terimlə fotosunu paylaşaraq, “türkiyəli və suriyalı dostlarımı bağrıma basıram” yazıb.