Futbol üzrə İtaliya çempionatının qalibi məlum oldu

İtaliya A Seriyasında yeni çempionun adına Udine şəhərində aydınlıq gəlib.

33-cü turun matçında “Udineze”nin qonağı olan “Napoli” 13-cü dəqiqədə hesabda geriyə düşsə də, 52-ci dəqiqədə Viktor Osimhenin topu ilə tarazlığı bərpa edib. Qalan vaxtda başqa qol olmayıb və titul üçün 1 xal qazanmağı kifayət edən “Napoli” tarixində 3-cü dəfə Skudettonun sahibi olub.

Qeyd edək ki, 1990-cı ildən sonra ilk dəfə A Seriyasında qalib gələn kollektivin uğurunda 22 qolla hazırda bombardirlər siyahısına başçılıq edən Viktor Osimhen, habelə aktivində 12 top və 10 məhsuldar ötürmə olan Xviça Kvaratsxeliya vacib rol oynayıb.

Bundan başqa, komandanın qızıl medalları qazanmasında daha bir önəmli şəxs baş məşqçi Luçano Spallettidir. 2021-ci ildən “Napoli”nin sükanı arxasında olan mütəxəssisin rəhbərliyi ilə klub ötən il də çempionluq uğrunda mübarizə aparsa da, yekunda 3-cü yerlə kifayətlənmişdi.