Güləşçilərimiz "Zaqreb Open" yarışının ilk günündə 3 medal qazanıb

Xorvatiyanın paytaxtı Zaqrebdə ilin ilk güləş turniri – “Zaqreb Open” yarışına start verilib.

Mübarizənin 1-ci günündə sərbəst güləşçilərimiz 3 medal qazanıblar. Təmsilçilərimizdən Əliabbas Rzazadə və Nurəddin Novruzov 61, Cəbrayıl Qadjiyev isə 74 kq çəki dərəcəsində bürünc medala yiyələnib.

Yarışa 1/4 final mərhələsindən start verən Əliabbas burada ABŞ idmançısına qalib gəlsə də, yarımfinalda Monqolustan nümayəndəsinə uduzub. Bürünc mükafat uğrunda görüşdə isə Puerto-Rikolu Jozef Silvadan güclü olan Rzazadə yekunda 3-cü yerin sahibi olub.

61 kq-da yer alan digər pəhləvanımız Nurəddin Novruzov da ilk qarşılaşmada qələbə qazansa da, sonradan uduzaraq, bürünc medal uğrunda mübarizə aparıb. Burada isə təmsilçimiz israilli Daniel Popovu məğlub edib. 74 kq çəki dərəcəsində güləşən Cəbrayıl Qadjiyev isə bürünc mükafat uğrunda görüşdə isveçrəli Tobias Portmanı məğlub edərək fəxri kürsüyə qalxıb.

Qeyd edək ki, yanvarın 14-dək davam edəcək “Zaqreb Open” turnirində ölkəmiz ümumən 28 idmançı ilə təmsil olunur.