III MDB oyunlarında təmsilçilərimiz uğura imza atıblar

Azərbaycanda keçirilən III MDB Oyunlarının üzgüçülük yarışlarında növbəti medalçılar müəyyənləşib.

Qadınların 100 metr məsafəyə "butterfly" üsulu üzrə üzməsində rusiyalı Yevgenia Sadovnikova qızıl, qazaxıstanlı Taissiya Korotkova gümüş, Azərbaycan təmsilçisi Mehri Əbdürəhmanlı bürünc medal əldə ediblər.

Kişilərin mübarizəsində 50 metr məsafəyə arxasıüstə üzmə yarışında da qaliblər bəlli olub. Rusiyalı Dmitrii Kravtsov birinci, Belarusdan olan Mikita Apanasik və Kiril Bantşeviç müvafiq olaraq 2 və 3-cü yerləri tutublar.

Azərbaycan üzgüçüsü Yeqor Maynitski III MDB Oyunlarında bürünc medal qazanıb. O, 200 metr məsafəyə dörd üslubdan ibarət fərdi üzgüçülük yarışında üçüncü olub.

Rusiyalı İlya Lamşanov qızıl, belaruslu Maksim Maluşka gümüş mükafat əldə edib. Süleyman İsmayılzadə isə III MDB Oyunlarında gümüş medal qazanıb. 1500 metr məsafəyə sərbəst üsulla üzmə yarışında ikinci olub.

Rusiyalı Aleksandr Filipets qızıl medal əldə etsə də, onun həmyerlisi Boqdan Toropkin üçüncü yerlə kifayətlənib.

Azərbaycanın stolüstü tennisçiləri III MDB Oyunlarında kürsüyə qalxıblar. Belə ki, qoşa yarışların yarımfinalında Belarusun Yana Zadsko-Sofiya Beliasava tandeminə 1-3 hesabı ilə uduzan Yağmur Məmmədli ilə Aylin Əsgərova üçüncü yeri tutublar.