İngiltərə çempionatı: “Mançester Yunayted” - “Çelsi" matçı

İngiltərə çempionatında 32-ci turdan təxirə salınan qarşılaşma keçirilib. “Mançester Yunayted” “Old Trafford” arenasında “Çelsi”ni qəbul edib.

Gözlənildiyi kimi maraqlı alınan qarşılaşmada azarkeşlər 5 qol görüblər. Oyunda ilk qolu 6-cı dəqiqədə Kazemiro vurub. Bununla da, braziliyalı yarımmüdafiəçi mankunianların heyətində 7-ci topuna imza atıb.

İlk hissənin sonlarında Marsyal fərqi 2-yə yüksəldib. 73-cü dəqiqədə Brunu Fernandeş 11 metrlik zərbəni dəqiq yerinə yetirərək komandasının üstünlüyünü bir qədər də möhkəmləndirib: 3-0.

Qalan vaxtda daha 2 qol qeydə alınıb. Əvvəlcə Markus Reşford “zadəganlar”ı 4-cü dəfə oyuna mərkəzdən başlamağa məcbur edib. 89-cu dəqiqədə isə Joao Feliş görüşdə son nöqtəni qoyub. “Mançester Yunayted” – “Çelsi”: 4-1.

Bu qələbədən sonra 72 xalla 3-cü yerdə olan mankunianlar ilk 4-də yerlərini təmin ediblər. Bundan başqa, “qırmızı şeytanlar” növbəti mövsüm UEFA Çempionlar liqasında iştirak hüququ qazanıblar.

Qeyd edək ki, ötən ildən komandada işləyən Erik Ten Haqın rəhbərliyi ilə “Mançester Yunayted” cari mövsümdə Liqa kubokunda qələbə qazanmaqla yanaşı, ölkə kubokunda finala yüksəlib.